ភ្នំពេញ៖ ករណីគ្រោះថ្នាក់ចរាចរណ៍រវាងរថយន្តសេរីទំនើប BMW i8 និងរថយន្តហាយឡែនដឺ កើតឡើងកាលពីវេលាម៉ោង ១២:៣០នាទីរំលងអធ្រាត្រ ឈានចូលថ្ងៃទី០២ ខែវិច្ឆិកា ឆ្នាំ២០២២ នៅត្រង់ចំណុចស្តុបទេពផន ស្ថិតក្នុងសង្កាត់ ទឹកល្អក់៣ ខណ្ឌទួលគោក ក្រោយម្ចាស់រថយន្ត BMW i8 បើកបំពានភ្លើងស្តុប។

យោងតាមប្រភពព័ត៌មានពីកន្លែងកើតហេតុ ឱ្យដឹងថា គេបានឃើញរថយន្តសេរីទំនើបមួយគ្រឿង ម៉ាក BMW i8 ពណ៌ស អត់មានស្លាកលេខ បើកបរដោយ នារីម្នាក់ដែលគេស្គាល់ថាជា មេតុងទីន និងអ្នកលក់អនឡាញ ឈ្មោះ ម៉ូលីកា បានធ្វើដំណើរតាមបណ្តោយផ្លូវម៉ៅសេទុង ក្នុងទិសដៅពីជើងទៅត្បូង ក្នុងល្បឿនលឿន បំពានភ្លើងសញ្ញាមិនប្រយ័ត្ន ក៏បុកគ្នាជាមួយរថយន្ត ហាយឡេនដឺ ពណ៌ទឹកប្រាក់ ពាក់ស្លាកលេខ ភ្នំពេញ 2AJ-1503 ដែលកំពុងធ្វើដំណើរឆ្លងផ្លូវ ពេញទំហឹងបណ្តាលឲ្យរងការខូចខាតទាំងសងខាង។

គួរឱ្យដឹងថា រថយន្តសេរីទំនើប BMW i8 បានបែកកញ្ចក់ខាងមុខផ្នែកតៃកុង និងខូចខាតផ្នែកខាងមុខខាងឆ្វេង និងផ្ទុះពោងការពារសុវត្ថិភាពស្ទើរគ្រប់កន្លែង។ រីឯរថយន្តហាយឡេនដឺ ខូចខាតផ្នែកខាងក្រោយខាងឆ្វេង ព្រមទាំងបែកកង់ក្រោយខាងឆ្វេង។

គួរបញ្ជាក់ថា ករណីគ្រោះថ្នាក់ចរាចរណ៍នេះគឺមិនមានអ្នករងរបួសនោះឡើយ ដោយ ក្រោយពេលកើតហេតុ សមត្ថកិច្ចជំនាញបានចុះមកធ្វើការវាស់វែង និងបានប្រគល់រថយន្តឱ្យទៅភាគីទាំងសងខាង ដើម្បីធ្វើការដោះស្រាយគ្នា បញ្ចប់រឿងនៅកន្លែងកើតហេតុតែម្តង៕